Msanii wa China Gao Zhen ahukumiwa kifungo cha miaka mitatu kwa kudhalilisha mashujaa na mashahidi

Msanii mashuhuri wa China Gao Zhen, anayetambulika kwa sanamu zake zenye utata za kiongozi wa zamani wa China Mao Zedong, amehukumiwa kifungo cha miaka mitatu gerezani baada ya kupatikana na hatia ya kudhalilisha 'mashujaa na mashahidi' wa China. Kulingana na mke wake na mashirika ya kutetea haki za binadamu, hukumu hiyo inajiri baada ya Gao kutumia miaka miwili kizuizini. Awali alizuiliwa wakati akitembelea China pamoja na familia yake. Hatua za kisheria dhidi ya Gao zimezua lawama za kimataifa. Malalamiko hayo yanajikita katika muda ambao mashtaka yalitolewa, kwani kazi za sanaa zilizoko kiini cha mashtaka hayo zilitengenezwa zaidi ya muongo mmoja kabla ya China kutunga sheria ambayo kwayo ameshtakiwa.